Jess Rooney

Pa lwybr addysg wnaethoch chi ei ddilyn o’r ysgol uwchradd i’r lle rydych chi heddiw? 

Dechreuais yn ifanc pan roddodd y cyngor gyfle imi gwblhau fy mhrofiad gwaith ysgol uwchradd yn yr adran adnewyddu tai. Rhoddodd hyn flas i mi ar y diwydiant, a gwneud i mi sylweddoli bod hon yn yrfa yr hoffwn ei dilyn. Ar ôl i mi adael yr ysgol uwchradd, fe wnes i astudio ar gyfer BTEC mewn Adeiladu yn y coleg. Er mwyn ehangu fy ngwybodaeth i fwy o agweddau ar yr amgylchedd adeiledig, mi wnes i hefyd fynychu cwrs AutoCAD 2D unwaith yr wythnos.

Ar ôl mynd i’r coleg, es i Brifysgol John Moores Lerpwl, gan astudio gradd mewn Arolwg Adeiladau. Yn ystod y gwyliau, roeddwn yn gweithio i gwmni arolygu yn Lerpwl i gael cymaint o brofiad â phosib. Ers hynny, rydw i wedi cwblhau fy Nghynllun Hyfforddiant Diogelwch i Reolwyr Safle (CITB SMSTS), cwrs Cenhadon Adeiladu, ac wedi bod i nifer o ddigwyddiadau hyfforddiant Datblygiad Proffesiynol Parhaus yn Read Construction.

Dywedwch ychydig mwy wrthym am ble rydych chi’n gweithio, a’ch rôl. 

Yn fy rôl, rwy’n gorfod mynd i gyfarfodydd cynnydd, a chysylltu â’r cleient rydyn ni’n gweithio iddo a phob parti sy’n gysylltiedig â’r prosiect, a rheoli pwyntiau BREEAM (Methodoleg Asesu Amgylcheddol y Sefydliad Ymchwil Adeiladu). Agwedd bwysig arall ar fy swydd yw gweithio gyda’r tîm Budd Cymunedol ar lefel safle, a chyfrannu at dudalen Facebook Cymunedol y Prosiect. 

Beth yw eich hoff beth am eich swydd? 

Yr hyn rwy’n ei hoffi fwyaf yw’r gwaith tîm sy’n digwydd ar brosiect; o’r Rheolwr Safle, Syrfëwr Meintiau i weithwyr y safle – mae pawb yn gweithio gyda’i gilydd i sicrhau prosiect llwyddiannus. 

Beth yw uchafbwynt eich diwrnod? 

Mae’n wych gweld nodau’n cael eu cyflawni drwy gydol y prosiect, a’r canlyniad terfynol yw’r uchafbwynt i mi, heb os.

Ble hoffech chi i’ch gyrfa fynd â chi? 

Rydw i’n mynd i barhau i fynychu cyrsiau a chael profiad o brosiectau fel Rheolwr Safle Cynorthwyol, ac i reoli fy mhrosiect gwerth miliynau o bunnoedd fy hun, gobeithio. 

Beth fyddech chi’n ei ddweud wrth rywun sy’n ystyried gyrfa ym maes adeiladu? 

Mae adeiladu’n ddiwydiant mawr ac amrywiol iawn, gyda miloedd o swyddi a llwybrau gyrfa i’r diwydiant. Os nad ydych chi’n siŵr pa agwedd yr hoffech chi ganolbwyntio arni, byddwn yn argymell dechrau gyda BTEC mewn Adeiladu cyffredinol fel y gwnes i ar ôl i mi adael yr ysgol. Bydd hyn yn rhoi blas i chi ar wahanol elfennau'r diwydiant, a bydd hyn wedyn yn eich helpu i fynd ymlaen i'r brifysgol ac astudio am radd fwy arbenigol.

Yn y pen draw, y cyngor gorau y gallwn ei roi yw manteisio ar unrhyw gyfle y cewch chi, a mynd ar gyrsiau drwy gydol eich addysg a’ch cyflogaeth. Mynychwch gyrsiau ychwanegol i ehangu eich sgiliau a manteisio ar unrhyw gyfle y cewch chi i fynd ar brofiad gwaith. Dydych chi byth yn peidio dysgu pethau newydd yn y diwydiant adeiladu gyda mwy a mwy o dechnolegau newydd yn cael eu defnyddio. Felly bydd ennill y profiad nawr yn helpu i roi hwb i chi ar yr ysgol yrfa ym maes adeiladu yn y dyfodol.