Mis Hanes Pobl Ddu mewn adeiladu: Simone Codrington

Yn ein cyfres barhaus o broffiliau Mis Hanes Pobl Ddu, buom yn siarad â Simone Codrington, Rheolwr Cynaliadwyedd yn y cwmni adeiladu Willmott Dixon.

A allwch chi ddweud wrthym am eich cefndir a sut y gwnaethoch chi ddod i ymwneud â'r diwydiant adeiladu yn y lle cyntaf?

Simone: “Astudiais wyddor amgylcheddol o lefel TGAU i lefel gradd, gan fy mod yn angerddol dros gynaliadwyedd. Rwyf wedi bod â diddordeb mawr yn yr amgylchedd ers amser maeth, ac ar ôl cael athrawes wyddor amgylcheddol wirioneddol frwdfrydig yn yr ysgol, deuthum yn fwyfwy angerddol dros y pwnc. Arweiniodd hyn at fynd ar ei drywydd yn broffesiynol a dewis gweithio yn y diwydiant adeiladu lle roeddwn yn gwybod y gallwn chwarae rhan fwy yn lleihau effaith ddynol ar yr amgylchedd.”

Allwch chi rannu rhai enghreifftiau o brosiectau neu fentrau lle rydych chi wedi chwarae rhan arwyddocaol neu wedi cael effaith gadarnhaol ar eich tîm neu gwmni?

Simone: “Ychydig flynyddoedd i mewn fy rôl, penderfynais ddechrau trefnu sesiynau codi sbwriel gyda thîm yn y swyddfa, a gafodd effeithiau cadarnhaol iawn ar les a chymhelliant pobl. Bûm mewn partneriaeth hefyd â’r Ymddiriedolaeth Camlesi ac Afonydd leol ar gyfer y fenter hon, yr ydym wedi bod yn ei chefnogi ers hynny ac wedi helpu i ariannu rhannau o’u gwaith gwella camlesi.  

Rwyf wedi bod ar y grŵp llywio Amrywiaeth a Chynhwysiant lleol yn Willmott Dixon ers cwpl o flynyddoedd bellach hefyd, ac wedi cefnogi mentrau rhanbarthol a Grŵp cyfan, yn ogystal â rhedeg fy rhai fy hun.

Rwyf hefyd yn cefnogi mentrau gyrfa. Gan fod prinder sgiliau yn ein diwydiant, mae sefydliadau yn chwarae rhan bwysig wrth ysbrydoli cenedlaethau iau i ddewis gyrfa ym maes adeiladu. Fel menyw o leiafrifoedd ethnig sy’n gweithio ym maes STEM, rwy’n chwarae rhan weithgar wrth gefnogi cydweithwyr i godi ymwybyddiaeth bod gyrfaoedd gwych ar gael ym maes adeiladu i bawb – beth bynnag fo’u rhyw neu ethnigrwydd.”

Yn eich barn chi, beth yw manteision cael gweithlu amrywiol yn y diwydiant adeiladu?

Simone: “Po fwyaf amrywiol yw’r gweithlu, y mwyaf o safbwyntiau a syniadau sydd. Gall y diwydiant adeiladu fod yn araf i newid yn aml, ond bydd y safbwyntiau amrywiol hyn ein helpu i gadw i fyny â’r byd modern. Drwy groesawu amrywiaeth, gall ddod â ffyrdd newydd o fynd i’r afael â’r heriau a wynebir gan y diwydiant a gwneud adeiladu yn lle hapusach, mwy diogel a mwy effeithiol i fod ynddo.”

Ydych chi wedi gweld unrhyw newidiadau neu welliannau cadarnhaol yn y diwydiant o ran amrywiaeth a chynhwysiant yn ystod eich gyrfa?

Simone: “Rwyf wedi gweld llawer mwy o hyfforddiant ar gael a llawer mwy o ymgyrchoedd yn ymwneud ag amrywiaeth a chynhwysiant, yn enwedig yma yn Willmott Dixon. Mae’r rhain yn wych ar gyfer codi ymwybyddiaeth a dysgu pobl sut i herio ymddygiad gwael, ond rwy’n dal i feddwl bod cryn bellter i fynd eto cyn y bydd adeiladu, fel llawer o ddiwydiannau, yn wirioneddol amrywiol a chynhwysol.”

Sut gall cwmnïau a sefydliadau adeiladu ddenu a chadw talent o gefndiroedd ethnig amrywiol yn well? 

Simone: “Cael timau cyflogi mwy amrywiol, cynnig rhaglenni mentora, ymchwilio i ba rwystrau y gall pobl o gefndiroedd ethnig fod yn eu hwynebu wrth ymuno â chwmnïau, neu resymau pam y maent yn gadael. Ac, yn bwysicaf oll, drwy wneud mwy na siarad am amrywiaeth a chynhwysiant yn unig, ond trwy wir sicrhau bod pobl yn cael eu parchu a’u gwerthfawrogi am bopeth y gallant ei gynnig i sefydliad fel ei fod yn rhan o’r diwylliant.