Mis Hanes Pobl Ddu mewn adeiladu: David Oloke

Ar gyfer Mis Hanes Pobl Ddu, buom yn siarad â David Oloke, peiriannydd sifil siartredig, rheolwr adeiladu ac academydd.

Wedi’i eni yn Nigeria, mae David wedi dod yn ffigwr uchel ei barch yn y byd peirianneg sifil. Mae wedi bod yn ymwneud ag addysgu ac ymchwil ers dros 20 mlynedd, ac yn ei swydd fel Pennaeth Addysg Dechnegol a Phrentisiaethau ym Mhrifysgol Brighton, mae gan David fewnwelediad gwirioneddol i bwysigrwydd prentisiaethau ym maes adeiladu. Mae hefyd yn arwain Canolfan Allgymorth Lifegate, elusen ffydd sy’n darparu amrywiaeth o brosiectau cymunedol.

Dywedodd David wrthym am ei yrfa yn y diwydiant adeiladu.

A allwch chi ddweud wrthym am eich cefndir a sut y gwnaethoch chi ddod i ymwneud â'r diwydiant adeiladu yn y lle cyntaf?

David: “Rwy’n beiriannydd sifil siartredig ac yn rheolwr adeiladu ac yn Gymrawd Sefydliad y Peirianwyr Sifil a’r Sefydliad Adeiladu Siartredig. Rwyf hefyd wedi bod yn academydd mewn rolau amrywiol dros yr ugain mlynedd diwethaf yn addysgu, ymchwilio a chynnal gweithgareddau trosglwyddo gwybodaeth ym meysydd peirianneg a’r amgylchedd adeiledig ehangach. Cefais fy nenu at y diwydiant adeiladu pan oeddwn yn iau o lawer, oherwydd fy niddordeb mewn dylunio a’r gweithredu o strwythurau o wahanol fathau.”

Allwch chi rannu rhai enghreifftiau o brosiectau neu fentrau lle rydych chi wedi chwarae rhan arwyddocaol neu wedi cael effaith gadarnhaol ar eich tîm neu gwmni?

David: “Ar ddechrau fy ngyrfa, tua thri degawd yn ôl yn fy ngwlad enedigol, Nigeria, roeddwn yn rhan o’r tîm a roddodd seilwaith Prosiectau Cyflenwi Dŵr Zobe a Sabke ar waith yng ngogledd Nigeria. Roedd y ddau brosiect yn werth dros £150m. Roeddwn hefyd yn arwain nifer o brosiectau Adferiad Dŵr Cenedlaethol a noddwyd gan Fanc y Byd ar y pryd.

Ers i mi gyrraedd y DU, rwyf wedi cael y cyfle i ymwneud â dylunio a gweithredu prosiectau mewn amrywiaeth eang o adeiladau (yn bennaf cynlluniau addasu, adnewyddu ac adfywio safleoedd). Mae’r rhain yn cynnwys pencadlys Asiantaeth Cenhadaeth y Byd yn Dartford, Canolfan Adeiladu ac Efelychu HDTI ym Mhrifysgol Coventry, Winners Chapel International yn Birmingham, a sawl datblygiad preswyl yn Birmingham a ledled y wlad.

Ar yr ochr academaidd, rwyf wedi goruchwylio myfyrwyr PhD ac wedi cyfrannu at ddylunio’r Brentisiaeth Gradd Syrfeio Rheoli Adeiladu gyntaf a, thrwy weithio â Rheoli Adeiladu Awdurdodau Lleol a Sefydliad y Peirianwyr Dymchwel, y rhaglen MSc Rheoli Dymchwel.”

Yn eich barn chi, beth yw manteision cael gweithlu amrywiol yn y diwydiant adeiladu?

David: “Mae gweithlu amrywiol yn y diwydiant adeiladu yn fuddiol iawn gan ei fod yn hwyluso arloesedd a rhyngweithiadau trawsddiwylliannol y mae mawr eu hangen. Fel diwydiant sy’n parhau i chwilio am ffyrdd o wella’r DPA allweddol o Amser, Cost, Adnoddau, Iechyd a Diogelwch, yr Amgylchedd a Chynaliadwyedd, mae amrywiaeth yn parhau i chwarae rhan allweddol. Mae diwylliannau a gwerthoedd amrywiol yn cael eu cyflwyno’n gyson mewn trafodaethau prosiect er budd y timau prosiect. Mae hyn yn ddefnyddiol iawn yn y byd academaidd a diwydiant.”

Ydych chi wedi gweld unrhyw newidiadau neu welliannau cadarnhaol yn y diwydiant o ran amrywiaeth a chynhwysiant yn ystod eich gyrfa? 

David: “Do, ond gellir gwneud mwy. Mae’r 20 mlynedd diwethaf yn y DU wedi gweld llawer o faterion yn effeithio ar fudo, megis ehangu’r UE i’r Dwyrain, Brexit ac yn fwy diweddar diwygiadau ynghylch prinder sgiliau. Er bod y diwydiant wedi sicrhau bod yn rhaid i randdeiliaid mawr gadw at Gydraddoldeb, Amrywiaeth a Chynhwysiant, gellir gwneud mwy o hyd i helpu i sicrhau bod pobl Ddu, Asiaidd a lleiafrifoedd ethnig eraill yn cael cyfleoedd i godi ar yr ysgol yrfaol yn unol â’u gwir botensial.”

Sut gall cwmnïau a sefydliadau adeiladu ddenu a chadw talent o gefndiroedd ethnig amrywiol yn well? 

David: “Rhaid i’r diwydiant barhau i ymdrechu am ragoriaeth a hefyd annog timau Cyngor, Gwybodaeth ac Arweiniad Gyrfaoedd mewn ysgolion a cholegau i wneud mwy i hysbysu darpar ymgeiswyr o’r grwpiau hyn am y cyfleoedd sydd ar gael yn y diwydiant. Dylai cwmnïau a sefydliadau hefyd sefydlu cynlluniau sy’n galluogi cyfleoedd lleoliad i bobl o gefndiroedd ethnig amrywiol.”