Gweinyddwr

Yn y swydd hon, mae angen i mi ddangos gwasanaeth gweinyddu rhagorol i dimau'r swyddfa a'r safle gan sicrhau bod yr holl systemau'n cael eu rhedeg mewn modd cynhyrchiol. Fel derbynnydd, mae angen i mi fod yn gwrtais ac yn broffesiynol â phawb sy'n ffonio ac yn ymweld â Keepmoat, gan sicrhau eu bod yn teimlo'n gartrefol ac yn gyfforddus.

Beth rydych yn ei fwynhau am eich swydd?

Rhan orau fy swydd yw rhyngweithio â chleientiaid, preswylwyr a chontractwyr. Rwyf hefyd yn mwynhau gallu cydweithio'n agos ag aelodau o staff o bob adran oherwydd rwy'n dysgu gwybodaeth newydd am y busnes a'r diwydiant bob dydd. Mae gallu dysgu'r wybodaeth hon am y diwydiant adeiladu yn gwneud i mi deimlo'n fwy hyderus am fy ngallu i wneud fy ngwaith yn iawn ac mae'n rhoi sicrwydd i'm cydweithwyr y gallaf gwblhau'r tasgau sydd eu hangen arnynt, a hynny i safon uchel.

Sut beth yw eich diwrnod gwaith?

Gan fy mod yn rhoi cymorth i bob un o adrannau'r timau yn y swyddfa ac ar y safle, mae fy niwrnod yn brysur ac yn llawn amrywiaeth fel arfer. Mae'n amrywio o helpu'r adrannau Datblygu Busnes gyda thendrau a chynigion i weithio ar y llinellau ffôn gofal cwsmeriaid.

Pa sgiliau sydd eu hangen arnoch ar gyfer eich swydd?

Mae angen nifer o sgiliau gwahanol ar gyfer y math hwn o swydd. Mae sgiliau trefnu rhagorol a sgiliau cyfathrebu da yn hanfodol, ac mae angen i chi allu cydweithio ag eraill a bodloni terfynau amser tyn. Mae angen i chi allu amldasgio'n effeithiol a dangos agwedd broffesiynol at eich gwaith. Mae hefyd yn ddefnyddiol meddu ar wybodaeth gefndirol am systemau a rhaglenni TG, a dealltwriaeth gefndirol o sgiliau ac arferion gwasanaeth cwsmeriaid.

Beth oedd eich cefndir cyn dechrau yn y rôl hon?

Cyn gweithio i Keepmoat roeddwn wedi gweithio i nifer o fanwerthwyr y stryd fawr, mewn nifer o rolau gwasanaeth cwsmeriaid. Rwyf hefyd wedi gweithio mewn nifer o rolau dros dro, yn y dderbynfa ac mewn swyddi gweinyddol. Yn ogystal â hyn, rwyf wedi ymgymryd ag amrywiaeth o swyddi gwirfoddol ac wedi codi arian i brosiectau ac elusennau yn y gymuned leol.

Beth rydych yn fwyaf balch ohono yn eich gyrfa?

Yr hyn rwyf yn fwyaf balch ohono yn Keepmoat yw bod yn rhan o dîm gofal cwsmeriaid cefnogol a lwyddodd i gydweithio'n agos ag elusen leol er mwyn trefnu dawns a gosodd dros £4000.

Ble rydych yn gweld eich hun ymhen 10 mlynedd?

Ymhen 10 mlynedd rwy'n gweld fy hun yn y diwydiant adeiladu o hyd, ond wedi symud ymlaen o faes gweinyddu. Rwy'n gobeithio defnyddio'r wybodaeth a'r cymwysterau rwyf wedi'u caffael i symud ymlaen i'r tîm Cynigion gan mai i'r maes hwnnw yn y diwydiant y mae fy set sgiliau a'm brwdfrydedd yn gweddu orau yn fy marn i.

Gair o gyngor ar sut i ymuno â'r diwydiant adeiladu?

Byddwch yn barod i ddysgu gwybodaeth newydd a gwneud tasgau na fyddech fel arfer yn eu gwneud, a chamwch y tu hwnt i'r hyn rydych yn gyfforddus ag ef gan y bydd hyn yn eich helpu i fagu hyder. Byddwn hefyd yn dweud wrthych am gydweithio – cydweithiwch ag eraill ar dasgau, byddwch yn frwdfrydig dros bob dyletswydd a wnewch, byddwch yn greadigol a dangoswch eich arloesedd i'ch rheolwr llinell drwy awgrymu syniadau a dulliau gweithredu newydd.

A byddwch yn ddidwyll – byddwch yn onest â'ch cydweithwyr er mwyn iddynt wybod pryd i gynyddu eich llwyth gwaith a phryd y mae'n amser i chi gymryd cam yn ôl.

Mae Kirsten McIntee yn brentis i weinyddwr datblygu gyda Robertson Group

Beth mae eich rôl yn ei gynnwys?

Rwy'n rhoi cymorth i bob rhan o Robertson Group drwy gynorthwyo'r gwaith o gyflenwi a monitro gweithgarwch cymunedol gan gynnwys hyfforddiant, lleoliadau gwaith, ymgysylltu â'r gymuned ac ymweliadau CCS.

Beth rydych yn ei fwynhau am eich swydd?

Mae'n amrywio o ddydd i ddydd ac nid oes dau ddiwrnod fel ei gilydd.

Sut beth yw eich diwrnod arferol?

Rwy'n treulio'r rhan fwyaf o'm hamser yn y swyddfa yn trefnu pecynnau i'w hanfon allan i leoliadau gwaith, yn casglu data gan fy nhîm ac yn eu helpu i baratoi ar gyfer ymweliadau CCS sydd ar ddod. Os nad wyf yn y swyddfa, rwyf allan ar y safle yn ei baratoi ar gyfer yr ymweliad CCS.

Pa sgiliau sydd eu hangen arnoch ar gyfer eich swydd?

Mae angen i chi fod yn drefnus ac yn gallu rheoli eich amser yn dda.

Beth oedd eich cefndir cyn dechrau yn y rôl hon?

Roeddwn yn yr ysgol. Nid oeddwn yn gweld fy hun yn mynd i'r brifysgol fel fy ffrindiau felly pan adewais ysgol cefais brentisiaeth, sef y dewis cywir i mi rwy'n credu.

Beth rydych yn fwyaf balch ohono yn eich gyrfa?

Dysgu cymaint mewn cyfnod mor fyr. Dim ond ers chwe mis rwyf yn y rôl hon a phan ddechreuais nid oeddwn yn gwybod unrhyw beth am y diwydiant adeiladu, ond erbyn hyn rwy'n deall mwy o lawer.

Ble rydych yn gweld eich hun ymhen 10 mlynedd?

Ar hyn o bryd, nid wyf wir yn gwybod ble rwy'n gweld fy hun ymhen 10 mlynedd. Rwy'n ifanc o hyd ac rwy'n awyddus i ddysgu cymaint â phosibl. Yn sicr, hoffwn gamu ymlaen yn y cwmni.

Gair o gyngor i unrhyw un sy'n ystyried gyrfa yn y diwydiant adeiladu?

Ewch amdani, yn bendant. Mae cymaint o rolau i ddewis ohonynt, boed hynny allan ar y safle neu yn y swyddfa.