Gosodwr systemau diogelwch rhag tân

Sut i fod yn osodwr systemau diogelwch rhag tân

Mae sawl ffordd o fod yn osodwr systemau diogelwch rhag tân. Gallech chi gwblhau cwrs coleg, cwblhau cwrs hyfforddiant, cael hyfforddiant yn y gwaith, neu wneud cais uniongyrchol i gyflogwr. 

Dylech ymchwilio i’r llwybrau hyn i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Coleg/darparwyr hyfforddiant

I fod yn osodwr systemau diogelwch rhag tân, gallech gwblhau cwrs hyfforddi a gynigir gan Y Gymdeithas Diogelwch Arbenigol Rhag Tân ar ffurf NVQ.

Darganfyddwch beth yw'r gofynion mynediad lle rydych chi'n byw.

• Eglurhad o’r gofynion mynediad cyfatebol
• Dod o hyd i gwrs yn eich ardal chi
• Cyngor am gyllid

Prentisiaeth

Gallech chi gwblhau prentisiaeth i ddod yn osodwr systemau diogelwch rhag tân. Mae’n cymryd 18 mis i gwblhau’r cynllun prentisiaeth Diogelwch rhag Tân Goddefol, ac mae’n arwain at NVQ Lefel 2 mewn Diogelwch rhag Tân Goddefol. Ar ôl i chi gwblhau’r hyfforddiant, byddwch yn gymwys i ddefnyddio offer arbenigol a defnyddio neu osod deunyddiau diogelu rhag tân.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

Darganfyddwch beth yw'r gofynion mynediad lle rydych chi'n byw.

• Canllawiau i brentisiaethau

Gwaith

Os oes gennych chi rywfaint o brofiad blaenorol, gallech chi wneud cais yn uniongyrchol i gwmni adeiladu i gael profiad ar safle fel gosodwr systemau diogelwch rhag tân. Gallech chi ddechrau arni fel cynorthwyydd i osodwr systemau diogelwch rhag tân mwy profiadol a symud ymlaen wrth i’ch galluoedd wella.

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel gosodwr systemau diogelwch rhag tân. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel gosodwr systemau diogelwch rhag tân: 

• Gallu dilyn lluniadau technegol
• Gallu i weithio ar eich liwt eich hun
• Dealltwriaeth am adeiladau ac adeiladu
• Lefel dda o ffitrwydd corfforol
• Hyderus yn gweithio mewn mannau uchel.

Cymwysterau

Beth mae gosodwr systemau diogelwch rhag tân yn ei wneud?

Fel gosodwr systemau diogelwch rhag tân, byddwch yn gyfrifol am osod a chynnal a chadw systemau diogelu rhag tân.

Mae swydd gosodwr systemau diogelwch rhag tân yn cynnwys y dyletswyddau canlynol: 

• Gosod cyfarpar diogelu strwythurol ar ffrâm adeilad, fel cladin sych, chwistrelli mwynol neu stribedi chwyddo.
• Adeiladu waliau a leininau nenfwd sy’n gwrthsefyll tân
• Gosod deunydd inswleiddio thermol ac acwstig, seliau tân, rhwystrau ceudod a phibelli sy’n gwrthsefyll tân
• Defnyddio offer mynediad fel ysgolion
• Dilyn lluniadau a chynlluniau technegol.
• Cadw at ganllawiau iechyd a diogelwch llym.

Faint o gyflog allech chi ei gael fel gosodwr systemau diogelwch rhag tân?

Mae’r cyflog disgwyliedig i osodwr systemau diogelwch rhag tân yn amrywio wrth i chi gael mwy o brofiad.

• Gall gosodwyr systemau diogelwch rhag tân sydd newydd eu hyfforddi ennill £25,000 - £30,000
• Gall gosodwyr systemau diogelwch rhag tân hyfforddedig gyda pheth brofiad ennill £30,000 - £40,000
• Gall uwch osodwyr systemau diogelwch rhag tân ennill mwy na £40,000.*

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf i osodwyr systemau diogelwch rhag tân:

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel gosodwr systemau diogelwch rhag tân, gallech fod yn arweinydd tîm neu’n amcangyfrifwr, neu sefydlu eich busnes gosod eich hun.

Gallech hefyd drosglwyddo eich sgiliau i rôl gosod arall, fel gosodwr deunydd inswleiddio ceudod.