Prentisiaethau Sgaffaldiau

Beth yw Sgaffaldiwr

Mae sgaffaldwyr yn chwarae rhan hollbwysig yn y diwydiant adeiladu, gan godi a datgysylltu sgaffaldiau metel dros dro ar safleoedd adeiladu er mwyn i’r gwaith adeiladu allu mynd rhagddo’n ddiogel ar lefelau uchel.  

Mae gweithio ym maes sgaffaldiau yn gorfforol anodd ac mae angen pen cryf ar gyfer uchder. Gallwch ddod yn sgaffaldiwr drwy nifer o lwybrau, a phrentisiaeth yw un o’r ffyrdd mwyaf poblogaidd.

Sut mae prentisiaethau sgaffaldiau yn gweithio?

Mae prentisiaeth sgaffaldiau yn cwmpasu egwyddorion ymarferol ar gyfer codi a datgysylltu gwahanol fathau o sgaffaldiau, gan gynnwys sgaffaldiau annibynnol, cawell adar, tŵr, cantilifer, palmentydd a tho. Byddwch hefyd yn cael hyfforddiant ar ddiogelwch cyffredinol yn y gweithle, arferion gwaith effeithlon, codi a chario, a sgiliau dysgu, gwybodaeth ac ymwybyddiaeth o ddulliau adeiladu sylfaenol, dehongli lluniadau ac amcangyfrif adnoddau.  

Mae prentisiaeth sgaffaldiau yn gymhwyster galwedigaethol mewn sgaffaldiau sy’n rhoi profiad yn y gwaith i brentisiaid gyda chyflogwr. Mae modd astudio cymhwyster NVQ Canolradd a Lefel 2.   

Ar ddiwedd eich prentisiaeth, byddwch nid yn unig yn ennill eich cymhwyster ond hefyd yn cael eich cerdyn Cynllun Cofnod Sgaffaldwyr y Diwydiant Adeiladu. Mae hyn yn dangos eich bod yn sgaffaldiwr cwbl gymwys.

Pa mor hir yw prentisiaethau sgaffaldiau?

Mae’n cymryd hyd at ddwy flynedd i gwblhau rhaglen brentisiaeth sgaffaldiau. Gallech ddilyn prentisiaeth Sgaffaldiau Canolradd sy’n cymryd 18 mis, neu’r Diploma Adeiladu Lefel 2 mewn Sgaffaldiau. Mae’r cymhwyster Lefel 2 yn cymryd rhwng 18 mis a dwy flynedd ac mae’n cynnwys 11 wythnos o hyfforddiant dros y cyfnod hwn, ynghyd â gweithio i gyflogwr am o leiaf 30 awr yr wythnos.    

Faint o gyflog fydda i’n ei gael fel prentis sgaffaldiau?

Fel prentis sgaffaldiau, mae gennych hawl i gael eich talu o leiaf yr Isafswm Cyflog Cenedlaethol neu’r Cyflog Byw Cenedlaethol - mae lefelau hyn yn dibynnu ar eich oedran.

Mae prentis sgaffaldiau yn cael ei dalu am y canlynol:

• Eich oriau gwaith arferol
• Hyfforddiant sy’n rhan o’ch prentisiaeth
• Astudio tuag at gymwysterau mathemateg a Saesneg os ydyn nhw’n rhan o’ch prentisiaeth

Hefyd, mae gennych hawl i’r isafswm lwfans gwyliau o 20 diwrnod y flwyddyn ynghyd â Gwyliau Banc.

Pa fathau o brentisiaethau sgaffaldiau sydd ar gael?

Beth fyddwch chi’n ei ddysgu yn ystod prentisiaeth sgaffaldiau?

Mae prentisiaid sgaffaldwyr yn dysgu pob agwedd ar godi a datgymalu llwyfannau sgaffaldiau, er mwyn iddynt fod yn ddiogel i grefftwyr eraill eu defnyddio. Mae’r sgiliau allweddol y mae sgaffaldwyr yn eu dysgu yn cynnwys:

• Codi a chario diogel
• Iechyd a diogelwch – atal cwympiadau a damweiniau, rhwystrau ac arwyddion
• Dysgu sut mae gweithio gydag offer a chyfarpar sgaffaldiau
• Deall y gwahanol fathau o sgaffaldiau, pryd a sut maen nhw’n cael eu defnyddio
• Gweithio gyda safonau, pwysau a thransomau
• Pontio gyda thrawstiau, ffaniau diogelu, cilfachau llwytho
• Adeiladu grisiau, fframiau codi, nenbontydd a rampiau
• Technegau arolygu
• Paratoi’r ardal waith
• Dehongli gwybodaeth o luniadau a manylebau
• Gosod sbardunau ac ategion ar rannau cantilifer

Y cymwysterau sydd eu hangen i fod sgaffaldiwr

Bydd pob lefel yn gofyn i brentisiaid weithio ar safleoedd adeiladu, lle bydd angen cerdyn Cynllun Ardystio Sgiliau Adeiladu (CSCS) arnoch.

Y sgiliau sydd eu hangen i fod sgaffaldiwr

Mae’r sgiliau dymunol ar gyfer sgaffaldiwr yn cynnwys: 

• Gallu gweithio’n hyderus mewn mannau uchel 
• Cydsymud rhagorol rhwng y llaw a’r llygad 
• Lefel dda o ffitrwydd corfforol
• Ymwybyddiaeth o iechyd a diogelwch
• Gallu deall lluniadau a chynlluniau technegol
• Sgiliau cyfathrebu ysgrifenedig a llafar da.

Y rhagolygon ar gyfer y dyfodol a chamu ymlaen yn eich gyrfa

Gall sgaffaldwyr cymwys ddod yn arolygwyr diogelwch safle, goruchwylwyr gangiau, dylunwyr sgaffaldiau neu reolwyr adeiladu. Gallech chi ddechrau eich busnes sgaffaldiau eich hun. Mae potensial i uwch sgaffaldwyr ennill cyflogau o £40,000 - £50,000.

Sut i wneud cais am brentisiaeth sgaffaldiau

Os oes gennych chi ddiddordeb mewn gwneud cais am brentisiaeth sgaffaldiau, un o’r pethau gorau i’w wneud yw chwilio am swyddi gwag sy’n cael eu cynnig gan gwmnïau adeiladu lleol. Chwiliwch ar wefannau swyddi a defnyddiwch wasanaeth prentisiaethau y llywodraeth. Os ydych chi wedi cael rhywfaint o brofiad gwaith blaenorol mewn cwmni, gofynnwch a yw'n cyflogi unrhyw brentisiaid newydd. Bydd yn rhaid i chi wneud cais am unrhyw rôl brentisiaeth, felly bydd angen i chi lunio CV, ysgrifennu llythyr eglurhaol a mynd i gyfweliad. 

Ble i ddod o hyd i brentisiaethau sgaffaldiau?

Dewiswch un o’r safleoedd postio swyddi isod i ddod o hyd i brentisiaethau sgaffaldiau yn Lloegr, Cymru a’r Alban.