Prentisiaethau CAD

Beth yw technegydd CAD?

Mae CAD yn chwarae rhan bwysig yn y diwydiant adeiladu modern. Fel technegydd neu weithiwr CAD, gallech fod yn troi syniad cleient neu fraslun pensaer yn fodel 3D rhyngweithiol o sut bydd adeilad yn edrych. Bydd eich gwaith yn cael ei werthfawrogi gan benseiri, peirianwyr a chleientiaid, a byddwch yn aelod pwysig o unrhyw dîm prosiect adeiladu.  

Gallech ddilyn gradd prifysgol neu gwrs coleg, ond mae prentisiaethau yn ffordd wych o ddilyn gyrfa ym maes CAD.  

Sut mae prentisiaethau CAD yn gweithio?

Fel rhan o brentisiaeth CAD, mae prentisiaid yn gweithio gyda phenseiri, peirianwyr a gweithwyr adeiladu eraill i gynhyrchu cynlluniau a lluniadau CAD. Byddwch yn datblygu sgiliau a hyfedredd yn y pecynnau meddalwedd CAD amrywiol, ac yn dysgu sut mae cymryd gwybodaeth dechnegol a’i throsi’n gynlluniau a lluniadau 3D a 2D a fydd yn cael eu defnyddio gan weithwyr adeiladu proffesiynol eraill.  

Mae technegydd CAD dan hyfforddiant yn dysgu sut i ddefnyddio meddalwedd dylunio gyda chymorth cyfrifiadur i greu modelau rhithwir 3D a chynlluniau 2D o adeiladau a nodweddion pensaernïol. Mae prentisiaid dylunio drwy gymorth cyfrifiadur yn dysgu sgiliau mewn CAD ac yn dod yn gyfrifol am gynhyrchu lluniadau technegol, gweddluniau, cynlluniau adeiladau, mapiau, diagramau a mathau eraill o gynlluniau ar gyfer prosiectau adeiladu. 

Pa mor hir yw prentisiaethau CAD?

Mae prentisiaethau CAD yn cymryd hyd at 3 blynedd i’w cwblhau. 

Faint o gyflog fydda i’n ei gael fel prentis CAD?

Bydd lefelau cyflog yn amrywio o gwmni i gwmni, ond gall prentisiaid technegwyr CAD ddisgwyl ennill o leiaf £17,000 yn y flwyddyn gyntaf, gan godi i dros £20,000 neu fwy erbyn diwedd y brentisiaeth. 

Pa fathau o brentisiaethau CAD sydd ar gael?

Mae technegwyr CAD hefyd yn cael eu galw’n weithwyr CAD, peirianwyr CAD, technegwyr BIM, technegwyr dylunio digidol a gweithredwyr CAD sifil. Er bod rhywfaint o amrywiadau yn nheitl pob swydd, bydd prentisiaeth CAD yn rhoi’r sgiliau hanfodol i chi ar gyfer pob un o’r rolau hyn. Dysgwch fwy gyda’n proffil swydd.

Mae prentisiaethau fel arfer yn cael eu cynnig mewn swyddi technegydd CAD. Efallai y bydd rhai prentisiaethau peirianneg sifil sy’n cynnwys gweithio gyda meddalwedd CAD, ond ni fydd y rhain yn darparu hyfforddiant cynhwysfawr ar gyfer prentisiaeth technegydd CAD. 

Beth fyddwch chi’n ei ddysgu yn ystod prentisiaeth CAD?

Mae CAD wedi disodli pensil a phapur ar gyfer penseiri, nad oes angen iddynt bellach dreulio oriau wrth eu byrddau lluniadu yn gwneud newidiadau manwl wrth i brosiect fynd rhagddo. Mae CAD wedi dod yn ffordd fwy greddfol, addasadwy ac effeithlon o gynllunio, modelu ac efelychu dyluniad adeiladau. Mae CAD hefyd yn fwy addas i gleientiaid, gan ei fod yn symleiddio’r broses o gynhyrchu modelau pensaernïol ac yn gwneud newidiadau dylunio yn haws eu dychmygu.  

Bydd prentisiaid CAD yn dysgu sut i wneud y canlynol:

• Llunio cynlluniau, gweddluniau, manylion technegol a chynlluniau adeiladau
• Llunio mapiau, diagramau neu gynlluniau ar gyfer prosiectau a strwythurau adeiladu
• Cynllunio a llunio manylion systemau rheoli pontydd, priffyrdd a dŵr gwastraff
• Diffinio problemau a dod o hyd i atebion
• Gweithio gyda phenseiri, peirianwyr, gwasanaethau adeiladu a gweithwyr adeiladu eraill i lunio cynlluniau a lluniadau
• Defnyddio pecynnau meddalwedd gwahanol i gyfleu cyfarwyddiadau am ddeunyddiau, manylebau technegol, gweithdrefnau cydosod, mesuriadau a gofynion safle

Y cymwysterau sydd eu hangen i ddod yn dechnegydd CAD

Er y bydd technegwyr prentisiaid CAD yn treulio’r rhan fwyaf o’u hamser yn gweithio mewn swyddfa, byddant yn ymweld â safleoedd adeiladu, felly bydd angen cerdyn Cynllun Ardystio Sgiliau Adeiladu (CSCS) arnynt.     

Y sgiliau sydd eu hangen i ddod yn dechnegydd CAD

Dylai prentisiaid CAD roi sylw rhagorol i fanylion, yn ogystal â meddu ar lefel dda o allu mewn mathemateg. Mae’n ddefnyddiol gallu gweithio’n dda gydag eraill a defnyddio eich crebwyll eich hun. Mae sgiliau cyfrifiadurol a sgiliau cyfathrebu yn hanfodol.  

Mae’n amlwg y dylai technegwyr neu weithwyr CAD sy’n brentisiaid fod yn fedrus ac yn angerddol am gelf a dylunio. Er y bydd eich sgiliau dylunio yn gwella drwy gydol eich prentisiaeth, dylai fod gennych lefel sylfaenol dda o hyfedredd mewn rhaglenni meddalwedd CAD fel Autodesk.  

Y rhagolygon ar gyfer y dyfodol a chamu ymlaen yn eich gyrfa

Mae rhagolygon gyrfa gwych ar gyfer technegwyr CAD cymwys. Gallech fod yn gweithio ym maes adeiladu, peirianneg sifil, gweithgynhyrchu neu brosiectau seilwaith mawr. Os oes gennych chi ddiddordeb go iawn mewn dylunio CAD ar gyfer sector penodol, ceisiwch ddod o hyd i brentisiaeth a fydd yn eich galluogi i weithio ar brosiectau dylunio gyda chymorth cyfrifiadur yn y maes hwn. 

Gall gweithwyr CAD sydd wedi cael hyfforddiant a phrofiad ennill rhwng £20,000 a £35,000. Mae gan weithwyr uwch, siartredig neu feistr CAD y potensial i ennill £35,000 - £50,000.

Sut i wneud cais am brentisiaeth CAD

Os oes gennych ddiddordeb mewn gwneud cais am brentisiaeth CAD, un o’r pethau gorau i’w wneud yw ymchwilio i’r diwydiant adeiladu ac edrych ar y ffyrdd mae’n defnyddio CAD. Pa gyfleoedd sydd ar gael i weithwyr CAD? Darllenwch astudiaethau achos o sut beth yw gweithio fel technegydd CAD, ac edrychwch ar rai o'r meysydd y gallech fod yn gweithio ynddynt. Gallech fod yn dylunio arwyddion, deunydd pacio neu beiriannau, nid dim ond adeiladau.

Chwiliwch ar wefannau swyddi, gwnewch gais uniongyrchol i gyflogwyr a defnyddiwch wasanaeth prentisiaethau y llywodraeth. Os ydych chi wedi cael rhywfaint o brofiad gwaith blaenorol mewn cwmni, gofynnwch a yw'n cyflogi unrhyw brentisiaid newydd. Bydd yn rhaid i chi wneud cais am unrhyw rôl brentisiaeth, felly bydd angen i chi lunio CV, ysgrifennu llythyr eglurhaol a mynd i gyfweliad. 

Ble i ddod o hyd i brentisiaethau CAD

Dewiswch un o'r safleoedd postio swyddi isod i ddod o hyd i brentisiaethau CAD yng Nghymru, Lloegr a'r Alban.